NEET PG மற்றும் FMGE இரண்டையும் சேர்த்து ஒரே தேர்வாக NEXT நடத்தப்படவுள்ளது

 மருத்துவ கல்லூரி இலவசம் என்பது தமிழ்நாட்டிலேயே இல்லாதபோது வெளிநாட்டில் எங்கனம் சாத்தியம்…

தமிழ்நாட்டில் அரசு மருத்துவக் கல்லூரியில் சேர்ந்தால் கூட குறைந்தபட்ச தொகை கட்டணமாக வசூலிக்கப்படுகிறது. விடுதி கட்டணம் மாதாந்திர மெஸ் செலவு, நூலகம், தேர்வுக்கட்டணம், புத்தகங்கள் மற்றும் மருத்துவ உபகரணங்கள் ஆகியவை தேவைப்படுகின்றன அரசாங்கம் மருத்துவ சீட்டு மட்டுமே இலவசமாக தரும் மற்ற அனைத்து செலவுகளும் உங்களுடையது தான்…

உலகத்தில் அதிக நாடுகளில் மருத்துவ கல்லூரிகள் செயல்பட்டு வருகின்றன…குறிப்பாக இந்திய மாணவர்கள் அதிகமாக தேர்வு செய்து படிக்கும் நாடுகள் ரஷ்யா சைனா சென்ட்ரல் அமெரிக்கா பிலிப்பைன்ஸ் பங்களாதேஷ் நேப்பாள் போன்ற நாடுகள்…

இதில் ரஷ்யா சீனா போன்ற நாடுகளில் மருத்துவம் பயில ஓராண்டு அந்த வட்டார மொழி பயில வேண்டியது அவசியமாகிறது. காரணம் மூன்றாண்டுகளுக்குப் பிறகு அங்குள்ள நோயாளிகளை சிகிச்சை அளிக்க அணுகும் போது அங்கு உள்ள நோயாளிகளுடன் பேச வட்டார மொழி அவசியமாகிறது. மேலும் அங்குள்ள விரிவுரையாளர்களுக்கு அவர்களின் தாய்மொழியை தவிர ஆங்கிலம் சற்று சிரமம் தான்…

பிலிப்பைன்ஸில் ஆங்கிலம் பயிற்று மொழி மற்றும் வட்டார மொழியாக இருந்து வருகிறது. ஆனால் இங்கு நேரடியாக எம்பிபிஎஸ்(MD) சேர முடியாது முதலாண்டு BS கல்வி பயில வேண்டும் அதன் பின்பு NMAT(National medical admission test) தேர்வில் தேர்ச்சி பெற வேண்டும். இந்த NMAT தேர்வு என்பது ஏறக்குறைய இந்தியாவிலுள்ள நீட் போன்ற தேர்வுக்கு சமமானது. இதில் தேர்ச்சி பெற்றால் மட்டுமே MD மருத்துவ படிப்பில் சேர முடியும்(MBBS).

பங்களாதேஷில் இந்தி மற்றும் பெங்காலி மொழிகள் வட்டார மொழிகளாக இருந்து வருகின்றன அங்கு பயிற்று மொழி ஆங்கிலம் மற்றும் பெங்காலி ஆகியவை. இந்தியாவில் பயன்படுத்தப்படும் அதே மருத்துவக் கல்லூரி நடைமுறைகள் தான் இங்கும் பின்பற்றப்படுகின்றன. ஏறக்குறைய இந்திய மருத்துவ புத்தகங்கள் தான் பயிற்றுவிக்கப்படுகின்றன. மற்ற நாடுகளைப் போன்று இந்திய உணவு கிடைக்கும் பிரச்சனை இங்கு இருக்காது. இந்திய உணவுகள் அனைத்தும் இங்கு கிடைக்கும். ரஷ்யா சீனாவை போன்று அதிக குளிர் இருக்காது. இந்த ஊரின் சீதோசன நிலை வட இந்தியாவை ஒத்திருக்கும். மேலும் இந்தியாவில் ஏற்படும் நோய்களைப் போலவே இங்கு உள்ள மக்களுக்கும் அதே சீதோஷண நோய்கள் தான் உண்டாகும் என்பதால் பயிற்சி மருத்துவம் பயில எளிதாக இருக்கும். மேலும் அவசர சூழ்நிலைகளில் பேருந்து, ரயில், விமானம் ஆகியவை மூலம் இந்தியாவிற்கு வந்து செல்வதும் எளிது. இதனால் போக்குவரத்து கட்டணமும் மற்ற நாடுகளை விட குறைவாகவே செலவு பிடிக்கும். கொல்கத்தாவிலிருந்து பங்களாதேஷ் செல்ல கட்டணம் மிகக் குறைவு.

மேலும் நீங்கள் கேட்டது இலவச மருத்துவ கல்வி தொடர்பானது…மேற்கூறிய இந்த அனைத்து நாடுகளிலுமே சுமார் 15 லிருந்து 50 லட்சம் வரை செலவு பிடிக்கக் கூடியது.

இதில் பங்களாதேஷில் மட்டும் சார்க் (SAARC) நாடுகள் கூட்டமைப்பிலள்ள நாடுகளின் மாணவர்களுக்கு ஸ்காலர்ஷிப் வழங்கப்படுகிறது. இதன்படி இந்திய மாணவர்களுக்கு அவர்களின் பத்தாவது, 12வது மற்றும் நீட் ஆகிய தேர்வுகளில் அதிக மதிப்பெண் பெற்றதை கணக்கில் கொண்டு அங்கு குறைந்த செலவில் மருத்துவம் படிக்க இடம் வழங்கப்படுகிறது. இது ஏறக்குறைய இந்தியாவில் அரசு ஒதுக்கீட்டில் தனியார் மருத்துவக் கல்லூரியில் ஆகும் செலவை ஒத்திருக்கும்.

ஒரு கூடுதலான தகவல்…

2022ஆம் ஆண்டிலிருந்து மருத்துவ படிப்பு முடித்தவுடன் NEXT (National exit test) தேர்வை எதிர்கொள்ள வேண்டும். FMGE தேர்வு என்பது 2021 பிறகு வெளிநாட்டில் மருத்துவ படிக்கும் மாணவர்களுக்கு கிடையாது. NEET PG மற்றும் FMGE இரண்டையும் சேர்த்து ஒரே தேர்வாக NEXT நடத்தப்படவுள்ளது. இந்த தேர்வை 2022கு பிறகு இங்குள்ள மருத்துவ மாணவர்களும் எதிர் கொண்டாகவேண்டும். ஆக உலகத்தில் நீங்கள் எங்கு மருத்துவம் படித்தாலும் ஒரு மருத்துவராக இந்தியாவில் பதிவு பெற இந்த NEXT தேர்வை எதிர்கொள்ள வேண்டியது அவசியம். ஆகவே வெளிநாட்டில் மருத்துவம் பற்றி கவலைப்பட வேண்டாம். காரணம் 2022 பிறகு இங்கு சென்னை அரசு கல்லூரியில் படித்த மருத்துவரும் வெளிநாட்டில் கல்வி பயின்ற ஒரு மருத்துவ மாணவரும் ஒன்றாக NEXT தேர்வு எழுதுவர். இந்தத் தேர்வில் தேர்ச்சி பெற்றால் மட்டுமே அவர்கள் இந்திய மருத்துவராக பதிவு பெற இயலும். இந்த தேர்வில் குறைந்தபட்சம் 150 மதிப்பெண்கள் எடுத்தவர்கள் ஒரு மருத்துவராக பதிவு பெற தகுதியானவர். இதில் அதிக மதிப்பெண் பெறுபவர்கள் MS MD போன்ற முதுநிலை கல்வி பயில கல்லூரிகளில் இடம் வழங்கப்படும்.

நாட்டில் தற்போது செயல்முறையில் இருக்கும் இந்திய மருத்துவ கவுன்சிலை (MCI) கலைத்துவிட்டு, தேசிய மருத்துவ ஆணையம் (NMC) அமைக்க மத்திய அரசு முடிவெடுத்துள்ளது. இதற்காக உருவாக்கப்பட்டுள்ள மசோதாவில் பல புதிய அம்சங்கள் இடம்பெற்றுள்ளன. முக்கியமாக, எம்பிபிஎஸ் இறுதி ஆண்டில் ‘நெக்ஸ்ட்’ (National Exit Test) தேர்வை எழுத வேண்டும்; இதில் வெற்றி பெறுபவர்கள்தான் இந்தியாவில் மருத்துவராகப் பணிபுரிய முடியும். ‘நெக்ஸ்ட்’ தேர்வு மதிப்பெண் மட்டுமே மருத்துவ முதுநிலைப் படிப்பில் அனுமதிப்பதற்குத் தகுதியாக ஏற்றுக்கொள்ளப்படும். இந்த மசோதாவுக்கு, மத்திய அமைச்சரவை சமீபத்தில் ஒப்புதல் அளித்துள்ளது. ஆனால், இந்திய மருத்துவ சங்கத்தைச் சேர்ந்த மருத்துவர்கள் இதைக் கடுமையாக எதிர்த்துவருகின்றனர். சென்ற வாரம் இந்தப் புதிய மசோதாவின் நகல் எரிக்கும் போராட்டத்தைத் தேசம் முழுவதும் நடத்தினர்.

இதுவரை, எம்பிபிஎஸ் மாணவர்கள் நான்கரை வருடக் கல்லூரிப் படிப்பை முடிக்க வேண்டும். அந்தந்த மருத்துவப் பல்கலைக்கழகங்கள்/கல்லூரிகள் நடத்தும் பொதுத் தேர்வுகளில் வெற்றிபெற்றதும், ஓர் ஆண்டு காலம் பயிற்சி மருத்துவராகப் பணிபுரிய வேண்டும். பிறகு, இந்திய மருத்துவ கவுன்சிலில் பதிவுசெய்து இந்தியாவில் எங்கு வேண்டுமானாலும் மருத்துவராகப் பணிபுரியலாம் என்னும் நடைமுறை இருந்தது. அதேபோல, முதுநிலை மருத்துவப் படிப்புக்குத் தனியாக ‘நீட்-பிஜி’ தேர்வை எழுத வேண்டும். அந்த மதிப்பெண் அடிப்படையில் முதுநிலை மருத்துவப் படிப்புக்கு மாணவர்கள் தேர்ந்தெடுக்கப்படுவது இப்போதுள்ள வழக்கம்.

புதிய நடைமுறை

இப்போதைய அறிவிப்பின்படி, ஒரு மருத்துவக் கல்லூரி மாணவர், முதல் மூன்றரை ஆண்டுகள் பல்கலைக்கழகம் நடத்தும் தேர்வுகளை எழுத வேண்டும். இந்தியா முழுவதும் நடத்தப்படும் ‘நெக்ஸ்ட்’ பொதுத்தேர்வை இறுதி ஆண்டில் எழுத வேண்டும். இதுவரை வெளிநாட்டில் மருத்துவம் படித்த இந்திய மாணவர்கள் ‘எஃப்எம்ஜிஇ’ தேர்வை எழுதினார்கள். அதில் வெற்றிபெற்றால்தான் இந்தியாவில் பயிற்சி மருத்துவராகவும், அதன் பிறகு பதிவுசெய்யப்பட்ட மருத்துவராகவும் பணியாற்ற முடியும். இந்தப் புதிய மசோதாவின்படி இனி அவர்களும் ‘நெக்ஸ்ட்’ பொதுத்தேர்வையே எழுத வேண்டும். முதுநிலை மருத்துவப் படிப்புகளில் சேர்வதற்கும் இனி ‘நெக்ஸ்ட்’ தேர்வுதான்.மருத்துவ மாணவர்கள் முதலாண்டு தொடங்கி இறுதி ஆண்டு வரை எல்லாப் பாடங்களையும் சரியாகப் படித்திருக்கிறார்களா என்பதைச் சோதிப்பதும், திறமையான மருத்துவர்களை உருவாக்குவதும், இந்தியாவில் உருவாகும் எல்லா மருத்துவர்களின் செயல்திறனும் ஒன்றுபோல் இருக்கவும், உலக அளவில் நம் மருத்துவர்களின் தரத்தை உயர்த்துவதும் இந்தத் தேர்வின் நோக்கம் என்கிறது மத்திய அரசு. எம்பிபிஎஸ் படிப்பில் நான்கரை ஆண்டுகளுக்கும் சேர்த்து மொத்தமாக 24 தாள்கள் இருக்கின்றன. இறுதி ஆண்டில் நான்கு பாடங்களுக்கு 7 தாள்கள். அனைத்துப் பாடத் தேர்வுகளிலும் எழுத்து, செய்முறை, வாய்மொழித் தேர்வுகள் உண்டு. தற்போதைய அறிவிப்பில், ‘நெக்ஸ்ட்’ தேர்வில் 24 தாள்களிலிருந்தும் கேள்விகள் கேட்கப்படுமா அல்லது இறுதி ஆண்டுக்கான நான்கு பாடங்களிலிருந்து மட்டும் கேள்விகள் கேட்கப்படுமா என்பதைத் தெளிவுபடுத்தவில்லை. 24 தாள்களையும் இணைத்த தேர்வாக இருந்தால், அது மாணவர்களுக்குப் பெரிய சுமையாகவும் தண்டனையாகவும் அமையும். இறுதி ஆண்டின் நான்கு பாடங்களுக்கு மட்டும் என்றால், அதன் மூலம் ஒட்டுமொத்த மருத்துவப் படிப்பின் தரத்தை உறுதிசெய்யவும் முடியாது; மேம்படுத்தவும் முடியாது.

பறிபோகும் கல்வி உரிமை

அடுத்து 2, 5, 10 மதிப்பெண் கேள்விகள், வழக்கமான தேர்வுமுறைப்படி இருக்குமா அல்லது கொடுத்த பதில்களில் சரியானதைத் தேர்ந்தெடுக்கும் கேள்விகளாக இருக்குமா என்பதையும் இந்த மசோதா தெளிவுபடுத்தவில்லை. எம்பிபிஎஸ் படிப்புக்கும் முதுநிலைப் படிப்புக்கும் பொதுவானது ‘நெக்ஸ்ட்’ தேர்வு என்கிறது மத்திய அரசு. இது அவசியமில்லாதது. காரணம், எம்பிபிஎஸ் முடித்த எல்லோருமே முதுநிலைப் படிப்புக்குச் செல்ல விரும்புவதில்லை; அப்படியே விரும்பினாலும் எல்லோருக்கும் அங்கு இடம் இல்லை. அதனால், பலரும் எம்பிபிஎஸ் பட்டம் பெற்றதும் தனியார் மருத்துவராகவோ, அரசு மருத்துவராகவோ பணிக்குச் சென்றுவிடுவர். தற்போதுள்ள தேர்வுமுறையில், இவர்கள் தங்கள் வசதிக்கு ஏற்ப, விரும்பும்போது ‘நீட்-பிஜி’ தேர்வு எழுதி முதுநிலைப் படிப்பில் சேர்ந்துகொள்ள முடியும். ஆனால், ‘நெக்ஸ்ட்’ தேர்வில் அதற்கான வாய்ப்பு இல்லை. மருத்துவராவதற்கும் முதுநிலைப் படிப்புக்கும் ‘நெக்ஸ்ட்’ மதிப்பெண்தான் முக்கியம் என்றாகிவிட்டால், முதலாண்டில் இருந்தே மாணவர்கள் ‘நெக்ஸ்ட்’ தேர்வுக்குத் தயாராவார்கள். அப்போது முதல் மூன்றரை ஆண்டு பாடங்களை முழுமனதுடன் படிக்க மாட்டார்கள். இது மாணவர்களின் தரத்தைக் குறைக்கும்.

‘நெக்ஸ்ட்’ தேர்வுமுறை மருத்துவ மாணவர் களுக்குச் சுமையாகும்போது, அதில் தேர்ச்சி பெறுவதற்குத் தனிப் பயிற்சிகள் தேவைப்படும். அப்போது இதற்கெனத் தனியார் பயிற்சி மையங்கள் உருவாகும். அவற்றில் பயிற்சி பெறுவதற்குப் பல லட்சங்கள் தேவைப்படும். எம்பிபிஎஸ் பட்டம் பெறுவதற்கே பல ஆண்டுகள் ஆகும். இதனால், விளிம்புநிலை மாணவர்கள் மருத்துவர்கள் ஆவதே எட்டாக் கனி ஆகிவிடும்; அடித்தட்டுப் பள்ளி மாணவர்களுக்கு மருத்துவப் படிப்பின் மீதுள்ள ஆர்வம் குறையும். அப்போது சமூகத்தில் உயர்நிலையில் இருப்பவர்களுக்கு மட்டுமே மருத்துவம் படிக்கும் வாய்ப்பு கிடைக்கும். இது ஏழை மற்றும் நடுத்தரவர்க்க மாணவர்களின் கல்வி உரிமையைப் பறிக்கும் செயலாகிவிடும்.

மக்கள்நல அரசின் கடமை

இந்தியாவில் 460-க்கும் மேற்பட்ட மருத்துவக் கல்லூரிகள் இருக்கின்றன. இங்கு இருக்கும் எல்லா மருத்துவக் கல்லூரிகளின் தரமும் ஒன்றல்ல. நாட்டில் பல மருத்துவக் கல்லூரிகளில் போதிய அளவுக்குப் பேராசிரியர்கள் இல்லை; திறமையான ஆசிரியர்களும் இல்லை; தரமான பரிசோதனைக் கருவிகள், ஆய்வுக்கூடம் மற்றும் நூலக வசதிகள் இல்லை. இருக்கும் பேராசிரியர்களுக்கும் மருத்துவமனைப் பணிகளே அதிகம் என்பதால், அவர்கள் எம்பிபிஎஸ் மாணவர்களுக்குப் பாடம் நடத்துவதில்லை; உதவிப் பேராசிரியர்கள், பயிற்சி ஆசிரியர்கள் அல்லது முதுகலை படிக்கும் மாணவர்கள்தான் வகுப்பு நடத்துகிறார்கள். இப்படிப்பட்ட சூழலில் இந்தியாவில் மருத்துவக் கல்லூரிகளின் தரத்தை ஒன்றுபடுத்தாமல் மாணவர்களின் தரம் மட்டும் ஒன்றுபோல் இருக்க வேண்டும் என்று அரசு எதிர்பார்ப்பது நகை முரண்.

ஆகவே, பல நிலைகளில் தெளிவில்லாத இந்த மசோதாவை அமல்படுத்துவதில் மத்திய அரசு அவசரப்படக் கூடாது. மருத்துவர்களின் கோரிக்கைகளையும் அலட்சியப்படுத்தக் கூடாது. கல்வியாளர்களின் கருத்துகளைக் கேட்டும், இன்னும் நன்றாக ஆலோசித்தும், தேர்வுமுறைகளைத் தெளிவுபடுத்தி, மாணவர்களின் கல்வி உரிமை பறிபோகாத அளவுக்கு இதை நடைமுறைப்படுத்த வேண்டியது காலத்தின் கட்டாயம்....மேலும் இந்த நெக்ஸ்ட் தேர்வு பற்றி தமிழ்நாட்டில் போதிய அளவு விழிப்புணர்வு இல்லை…

எனக்கு தெரிந்த வகையில் உள்ள தகவல்களை இங்கே கூறியிருக்கிறேன். நன்றி…

  நன்றி  : டாக்டர் கு.கணேசன், பொது நல மருத்துவர்.